zindagi tu bhi bewafa nikli

zindagī tū bhī bevafā niklī

kyā samajhte the aur kyā niklī

ghar ke dīvār-o-dar bhī kaañp ga.e

dil ke goshe se jab sadā niklī

ro paḌī vo huī udaas bahut

mere āñgan se jab sabā niklī

taar nāzuk the dil ke TuuT ga.e

chheḌ kar jab vo dil-rubā niklī

ham ināyat jise samajh ke chale

vo bhī āḳhir kaḌī sazā niklī

dostoñ ne kiye karam ham par

har duā un kī badduā niklī

jis balā se hamesha bach ke chale

moḌ par har galī ke aa niklī

jis ko nekī samajh ke tū ḳhush thā

vo bhī 'āzim' tirī ḳhatā niklī

zindagi tu bhi bewafa nikli

kya samajhte the aur kya nikli

ghar ke diwar-o-dar bhi kanp gae

dil ke goshe se jab sada nikli

ro paDi wo hui udas bahut

mere aangan se jab saba nikli

tar nazuk the dil ke TuT gae

chheD kar jab wo dil-ruba nikli

hum inayat jise samajh ke chale

wo bhi aaKHir kaDi saza nikli

doston ne kiye karam hum par

har dua un ki baddua nikli

jis bala se hamesha bach ke chale

moD par har gali ke aa nikli

jis ko neki samajh ke tu KHush tha

wo bhi 'azim' teri KHata nikli