zindagi tu ne ajab baat ye batlai hai

zindagī tū ne 'ajab baat ye batlā.ī hai

ik qayāmat hai bapā shahr meñ rusvā.ī hai

ḳhalvat-e-jān meñ guzrī hai mirī 'umr-e-ravāñ

aap kahte haiñ ki be-nām sazā paa.ī

aap ko haal batā.ūñ to batā.ūñ kaise

aap ke shahr meñ har shaḳhs tamāshā.ī hai

raat rangīñ meñ sitāroñ se saje joban par

raqs kartā huā dekhā koī maulā.ī hai

ek din kaif ke 'ālam meñ pukārā us ne

ye vahī dasht hai jis dasht meñ tanhā.ī hai

na tamanna na tamāshā na koī aah bharī

phir bhī āñkhoñ meñ mire dard kī gahrā.ī hai

ġham hazāroñ the ki ik aur mohabbat kar lī

ek rusvā ko milī muft meñ rusvā.ī hai

merī duniyā meñ ḳhamoshī ke 'alāva nahīñ kuchh

āḳhirī vaqt meñ ye baat samajh aa.ī hai

us ne jakḌā hai mujhe kāñToñ ke bistar se 'umūd'

phir tabassum bhare hoñToñ se qasam khaa.ī hai

zindagi tu ne 'ajab baat ye batlai hai

ek qayamat hai bapa shahr mein ruswai hai

KHalwat-e-jaan mein guzri hai meri 'umr-e-rawan

aap kahte hain ki be-nam saza pai

aap ko haal bataun to bataun kaise

aap ke shahr mein har shaKHs tamashai hai

raat rangin mein sitaron se saje joban par

raqs karta hua dekha koi maulai hai

ek din kaif ke 'alam mein pukara us ne

ye wahi dasht hai jis dasht mein tanhai hai

na tamanna na tamasha na koi aah bhari

phir bhi aankhon mein mere dard ki gahrai hai

gham hazaron the ki ek aur mohabbat kar li

ek ruswa ko mili muft mein ruswai hai

meri duniya mein KHamoshi ke 'alawa nahin kuchh

aaKHiri waqt mein ye baat samajh aai hai

us ne jakDa hai mujhe kanTon ke bistar se 'umud'

phir tabassum bhare honTon se qasam khai hai