zindagi tu ne kabhi KHud ko sanwara bhi nahin

zindagī tū ne kabhī ḳhud ko sañvārā bhī nahīñ

jhilmilātā tire māthe pe sitārā bhī nahīñ

sar Tikāyā hī thā dīvār pe āñkheñ chhalkīñ

aaj vo vaqt hai tinke kā sahārā bhī nahīñ

gaañv ke kachche makāñ būḌhe shajar yaad aa.e

shahr-e-be-dard meñ ab merā guzārā bhī nahīñ

lafz ne aaheñ bharīñ aur qalam bhī royā

dard kāġhaz pe abhī ham ne utārā bhī nahīñ

vo chamaktī hai añdheroñ meñ sitāroñ kī tarah

Dhang se jis ne kabhī ḳhud ko sañvārā bhī nahīñ

zindagi tu ne kabhi KHud ko sanwara bhi nahin

jhilmilata tere mathe pe sitara bhi nahin

sar Tikaya hi tha diwar pe aankhen chhalkin

aaj wo waqt hai tinke ka sahaara bhi nahin

ganw ke kachche makan buDhe shajar yaad aae

shahr-e-be-dard mein ab mera guzara bhi nahin

lafz ne aahen bharin aur qalam bhi roya

dard kaghaz pe abhi hum ne utara bhi nahin

wo chamakti hai andheron mein sitaron ki tarah

Dhang se jis ne kabhi KHud ko sanwara bhi nahin