zindagi waqf-e-gham-o-hasrat-o-alam sahi

zindagī vaqf-e-ġham-o-hasrat-o-ālām sahī

aap de deñ to yahī ishq kā in.aam sahī

na sahī un kī mohabbat kā asar ai hamdam

dil ko ehsās-e-ġham-e-gardish-e-ayyām sahī

be-niyāz-e-ḳhum-o-paimāna rahe ham lekin

aaj saaqī kī ināyat hai to ik jaam sahī

us ne dekhā to sahī dil ko ba-ehsās-e-vafā

phir bhī afsāna mirā tishna-e-anjām sahī

rahrav-e-shauq ye vāmāndagi-e-shauq hai kyā

duur manzil hai agar aur bhī do-gām sahī

aa bhī jaa.eñ ki nikal jaa.e mirī hasrat-e-dīd

un kā aanā hai agar maut kā paiġhām sahī

zindagi waqf-e-gham-o-hasrat-o-alam sahi

aap de den to yahi ishq ka inam sahi

na sahi un ki mohabbat ka asar ai hamdam

dil ko ehsas-e-gham-e-gardish-e-ayyam sahi

be-niyaz-e-KHum-o-paimana rahe hum lekin

aaj saqi ki inayat hai to ek jam sahi

us ne dekha to sahi dil ko ba-ehsas-e-wafa

phir bhi afsana mera tishna-e-anjam sahi

rahraw-e-shauq ye wamandagi-e-shauq hai kya

dur manzil hai agar aur bhi do-gam sahi

aa bhi jaen ki nikal jae meri hasrat-e-did

un ka aana hai agar maut ka paigham sahi