zindagi yun to guzar jati hai aaram ke sath

zindagī yuuñ to guzar jaatī hai ārām ke saath

kashmakash sī hai magar gardish-e-ayyām ke saath

rif.ateñ dekhtī rah jaatī haiñ us kī parvāz

vo tasavvur ki hai vābasta tire naam ke saath

mil hī jā.egī kabhī manzil-e-maqsūd-e-sahar

shart ye hai ki safar karte raho shaam ke saath

dām-e-hastī hai ḳhush-ā.ind bhī dilkash bhī magar

uḌte jaate haiñ giraftār usī daam ke saath

jab kisī lamha-e-daurāñ ko TaTolā ham ne

rū-e-āġhāz nazar aayā hai anjām ke saath

un rivāyāt ko dohrāte haiñ ham az-sar-e-nau

vo jo mansūb haiñ sadiyoñ se tire naam ke saath

harf aa.e na 'tamannā.ī' kahīñ saaqī par

aaj mahfil meñ chale aa.e haiñ ham jaam ke saath

zindagi yun to guzar jati hai aaram ke sath

kashmakash si hai magar gardish-e-ayyam ke sath

rifaten dekhti rah jati hain us ki parwaz

wo tasawwur ki hai wabasta tere nam ke sath

mil hi jaegi kabhi manzil-e-maqsud-e-sahar

shart ye hai ki safar karte raho sham ke sath

dam-e-hasti hai KHush-aind bhi dilkash bhi magar

uDte jate hain giraftar usi dam ke sath

jab kisi lamha-e-dauran ko TaTola hum ne

ru-e-aghaz nazar aaya hai anjam ke sath

un riwayat ko dohraate hain hum az-sar-e-nau

wo jo mansub hain sadiyon se tere nam ke sath

harf aae na 'tamannai' kahin saqi par

aaj mahfil mein chale aae hain hum jam ke sath