zindagi zinda hai lekin kisi dam-saz ke sath

zindagī zinda hai lekin kisī dam-sāz ke saath

varna yuuñ jaise kabūtar koī shahbāz ke saath

bijliyāñ saath liye zahr bhare lamhoñ kī

vaqt chaltā hai zamāne meñ kis andāz ke saath

āsmāñ jaane kahāñ le ke chalā hai mujh ko

uupar uThtā hai barābar mirī parvāz ke saath

aaj tanhā huuñ to kyaa, dekhtā rahnā kal tak

aur āvāzeñ bhī hoñgī mirī āvāz ke saath

ek āġhāz ubhartā hai har anjām ke ba.ad

ek anjām bhī paltā hai har āġhāz ke saath

ek lamha ki garāñ hai mujhe tanhā.ī meñ

ek duniyā ki javāñ hai mire hamrāz ke saath

zindagi zinda hai lekin kisi dam-saz ke sath

warna yun jaise kabutar koi shahbaz ke sath

bijliyan sath liye zahr bhare lamhon ki

waqt chalta hai zamane mein kis andaz ke sath

aasman jaane kahan le ke chala hai mujh ko

upar uThta hai barabar meri parwaz ke sath

aaj tanha hun to kya, dekhta rahna kal tak

aur aawazen bhi hongi meri aawaz ke sath

ek aaghaz ubharta hai har anjam ke baad

ek anjam bhi palta hai har aaghaz ke sath

ek lamha ki garan hai mujhe tanhai mein

ek duniya ki jawan hai mere hamraaz ke sath