ziyaada saz-o-saman kuchh nahin ai baghban mera

ziyāda sāz-o-sāmāñ kuchh nahīñ ai bāġhbāñ merā

banā hai chaar tinkoñ se chaman meñ āshiyāñ merā

shabāb-e-bevafā kī kis se ai piirī ḳhabar miltī

phirā ab tak na jā kar qāsid-e-umr-e-ravāñ merā

vafā-dārī ke jauhar aap ho jā.eñge ā.īna

tumheñ ḳhud haal khul jā.egā vaqt-e-imtihāñ merā

ravāñ hai qāfila ashkoñ kā har dam chashm-e-giryāñ se

chalā jaatā hai roz-o-shab barābar kārvāñ merā

adā-e-arz-e-matlab meñ ġhazab kī kāmyābī hai

ajab husn-e-talab rakhtā hai andāz-e-fuġhāñ merā

tafāvut hai zamīn-o-āsmāñ kā ijz-o-naḳhvat meñ

ḳhayāl-e-husn-o-ishq ai dil kahāñ un kā kahāñ merā

shab-e-furqat kā soyā shor-e-sub.h-e-hashr se chauñkā

'shahīr' is se ziyāda hogā kyā ḳhvāb-e-girāñ merā

ziyaada saz-o-saman kuchh nahin ai baghban mera

bana hai chaar tinkon se chaman mein aashiyan mera

shabab-e-bewafa ki kis se ai piri KHabar milti

phira ab tak na ja kar qasid-e-umr-e-rawan mera

wafa-dari ke jauhar aap ho jaenge aaina

tumhein KHud haal khul jaega waqt-e-imtihan mera

rawan hai qafila ashkon ka har dam chashm-e-giryan se

chala jata hai roz-o-shab barabar karwan mera

ada-e-arz-e-matlab mein ghazab ki kaamyabi hai

ajab husn-e-talab rakhta hai andaz-e-fughan mera

tafawut hai zamin-o-asman ka ijz-o-naKHwat mein

KHayal-e-husn-o-ishq ai dil kahan un ka kahan mera

shab-e-furqat ka soya shor-e-subh-e-hashr se chaunka

'shahir' is se ziyaada hoga kya KHwab-e-giran mera