ziyan jigar ka sahi ye jo shaghl-e-baada hai

ziyāñ jigar kā sahī ye jo shaġhl-e-bāda hai

dil-o-nazar ke liye is meñ kuchh ifāda hai

dikhā.ī dī hai jhalak us kī ek muddat ba.ad

ye ḳhvāb mere liye ḳhvāb se ziyāda hai

milā.egā ye kisī shāhrāh se mujh ko

miTā miTā sā jo qadmoñ meñ mere jaada hai

yahī bachā.egā tum dekhnā mirī baazī

bisāt par jo ye nāchīz sā piyāda hai

ye soch kar vo mirī baat kaaT dete haiñ

ki ho na ho ye kisī baat kā i.aada hai

yahāñ raheñge vo mere harīf ke hamrāh

unheñ gumāñ hai mirā dil bahut kushāda hai

vo ahl-e-bazm kī rañgīñ-navā.ī apnī jagah

hazār rañg liye merā harf saada hai

agar ḳhudā ne nikālā butoñ ke chakkar se

tavāf-e-ka.aba kā ab ke baras irāda hai

ziyan jigar ka sahi ye jo shaghl-e-baada hai

dil-o-nazar ke liye is mein kuchh ifada hai

dikhai di hai jhalak us ki ek muddat baad

ye KHwab mere liye KHwab se ziyaada hai

milaega ye kisi shahrah se mujh ko

miTa miTa sa jo qadmon mein mere jada hai

yahi bachaega tum dekhna meri bazi

bisat par jo ye nachiz sa piyaada hai

ye soch kar wo meri baat kaT dete hain

ki ho na ho ye kisi baat ka iada hai

yahan rahenge wo mere harif ke hamrah

unhen guman hai mera dil bahut kushada hai

wo ahl-e-bazm ki rangin-nawai apni jagah

hazar rang liye mera harf sada hai

agar KHuda ne nikala buton ke chakkar se

tawaf-e-kaba ka ab ke baras irada hai