zohar-e-ashiqi se Darta hun

zohar-e-āshiqī se Dartā huuñ

husn kī barhamī se Dartā huuñ

maiñ ne Daalī kamand sūraj par

phir bhī maiñ raushnī se Dartā huuñ

aa basā huuñ galī meñ chīḳhoñ kī

is liye ḳhāmushī se Dartā huuñ

masḳh pahchān ho na jaa.e kahīñ

be-amal zindagī se Dartā huuñ

kuchh safā.ī meñ apnī kahnā hai

par tirī munsifī se Dartā huuñ

ḳhaar ko ḳhaar gul ko gul kah duuñ

maiñ kahāñ kab kisī se Dartā huuñ

apnī tanhā.ī ḳhuub hai 'mohsin'

bazm kī be-ruḳhī se Dartā huuñ

zohar-e-ashiqi se Darta hun

husn ki barhami se Darta hun

main ne Dali kamand suraj par

phir bhi main raushni se Darta hun

aa basa hun gali mein chiKHon ki

is liye KHamushi se Darta hun

masKH pahchan ho na jae kahin

be-amal zindagi se Darta hun

kuchh safai mein apni kahna hai

par teri munsifi se Darta hun

KHar ko KHar gul ko gul kah dun

main kahan kab kisi se Darta hun

apni tanhai KHub hai 'mohsin'

bazm ki be-ruKHi se Darta hun