zulf chhuTti tere ruKH par to dil apna phirta

zulf chhuTtī tire ruḳh par to dil apnā phirtā

ghar ko be-shām nahīñ sub.h kā bhūlā phirtā

dekhne ko jo mirā tū na tamāshā phirtā

to maiñ juuñ sho.ala-e-javvāla na chaltā-phirtā

kab jafāoñ se tirī dil hai hamārā phirtā

shak agar tujh ko hai zālim to dobāra phirtā

baḳht-e-bargashta-e-majnūñ abhī sīdhe ho jaa.eñ

dasht meñ aa.e agar nāqa-e-lailā phirtā

gardish-e-charḳh se sar kyuuñ na mah-o-ḳhur kā phire

ki shab o roz ye rahtā hai hiñDolā phirtā

jins-e-dil kā tirī us zulf se phirnā ma.alūm

ho ke ḳhat-kash jo bike vo nahīñ saudā phirtā

ḳhāl-e-ruḳhsār-e-butāñ kā nahīñ bhartā ye ḳhayāl

kishvar-e-dil meñ hamāre hai kanhayyā phirtā

dil kī qismat meñ azal se thī likhī tishna-labī

kyuuñ na us chāh-e-zaqan se ye piyāsā phirtā

sharm se dāman-e-sāhil meñ chhupī hai har mauj

tū jo aThkheliyoñ se hai lab-e-dariyā phirtā

dard-e-dil ishq kī chausar meñ na kaTtī hargiz

gar kabhī jiit kā apnī koī paasā phirtā

aaj piirī meñ bhī apne na phire baḳht-e-siyāh

ki daraḳhtoñ kā bhī din Dhalte hī saayā phirtā

TuuT jaatī jo kabhī aas tire milne kī

to na laTTū kī tarah dil ye hamārā phirtā

bā.is-e-jumbish-e-insāñ hai to ai tār-e-nafas

varna ye baiTh ke uThtā na ye chaltā-phirtā

sair-e-sahrā-e-junūñ-ḳhez kā armāñ na rahā

tere hāthoñ se maiñ kyā ābla-e-pā phirtā

tū ne har kaam pe kī chasm-numā.ī varna

maiñ bagūle kī tarah ḳhaak uḌātā phirtā

apne girye kī dikhātā maiñ tujhe tuġhyānī

gar shab-e-vasl mire paas na tū aa phirtā

anjum-e-charḳh bhī ban jaate haiñ mānind-e-habāb

maah kā sūrat-e-girdāb hai baalā phirtā

likh 'nasīr' ek ġhazal aur badal kar ke radīf

tausan-e-ḳhāma hai ab dekh to kaisā phirtā

zulf chhuTti tere ruKH par to dil apna phirta

ghar ko be-sham nahin subh ka bhula phirta

dekhne ko jo mera tu na tamasha phirta

to main jun shoala-e-jawwala na chalta-phirta

kab jafaon se teri dil hai hamara phirta

shak agar tujh ko hai zalim to dobara phirta

baKHt-e-bargashta-e-majnun abhi sidhe ho jaen

dasht mein aae agar naqa-e-laila phirta

gardish-e-charKH se sar kyun na mah-o-KHur ka phire

ki shab o roz ye rahta hai hinDola phirta

jins-e-dil ka teri us zulf se phirna malum

ho ke KHat-kash jo bike wo nahin sauda phirta

KHal-e-ruKHsar-e-butan ka nahin bharta ye KHayal

kishwar-e-dil mein hamare hai kanhayya phirta

dil ki qismat mein azal se thi likhi tishna-labi

kyun na us chah-e-zaqan se ye piyasa phirta

sharm se daman-e-sahil mein chhupi hai har mauj

tu jo aThkheliyon se hai lab-e-dariya phirta

dard-e-dil ishq ki chausar mein na kaTti hargiz

gar kabhi jit ka apni koi pasa phirta

aaj piri mein bhi apne na phire baKHt-e-siyah

ki daraKHton ka bhi din Dhalte hi saya phirta

TuT jati jo kabhi aas tere milne ki

to na laTTu ki tarah dil ye hamara phirta

bais-e-jumbish-e-insan hai to ai tar-e-nafas

warna ye baiTh ke uThta na ye chalta-phirta

sair-e-sahra-e-junun-KHez ka arman na raha

tere hathon se main kya aabla-e-pa phirta

tu ne har kaam pe ki chasm-numai warna

main bagule ki tarah KHak uData phirta

apne girye ki dikhata main tujhe tughyani

gar shab-e-wasl mere pas na tu aa phirta

anjum-e-charKH bhi ban jate hain manind-e-habab

mah ka surat-e-girdab hai baala phirta

likh 'nasir' ek ghazal aur badal kar ke radif

tausan-e-KHama hai ab dekh to kaisa phirta