zulf jo ruKH par tere ai mehr-e-talat khul gai

zulf jo ruḳh par tire ai mehr-e-tal.at khul ga.ī

ham ko apnī tīra-rozī kī haqīqat khul ga.ī

kyā tamāshā hai rag-e-lailā meñ Duubā neshtar

fasd-e-majnūñ bā.is-e-josh-e-mohabbat khul ga.ī

dil kā saudā ik nigah par hai tirī Thahrā huā

narḳh tū kyā pūchhtā hai ab to qīmat khul ga.ī

aa.ine ko naaz thā kyā apne rū-e-sāf par

aañkh hī par dekhte hī terī sūrat khul ga.ī

thī asīrān-e-qafas ko aarzū parvāz kī

khul ga.ī khiḌkī qafas kī kyā ki qismat khul ga.ī

tere aariz par huā āḳhir ġhubār-e-ḳhat numūd

khul ga.ī ā.īna-rū dil kī kudūrat khul ga.ī

be-takalluf aa.e tum khole hue band-e-qabā

ab girah dil kī hamāre fil-haqīqat khul ga.ī

bāñdhī zāhid ne tavakkul par kamar sau baar chust

lekin āḳhir bā.is-e-sustī-e-himmat khul ga.ī

khulte khulte ruk ga.e vo un ko tū ne ai 'zafar'

sach kaho kis aañkh se dekhā ki chāhat khul ga.ī

zulf jo ruKH par tere ai mehr-e-talat khul gai

hum ko apni tira-rozi ki haqiqat khul gai

kya tamasha hai rag-e-laila mein Duba neshtar

fasd-e-majnun bais-e-josh-e-mohabbat khul gai

dil ka sauda ek nigah par hai teri Thahra hua

narKH tu kya puchhta hai ab to qimat khul gai

aaine ko naz tha kya apne ru-e-saf par

aankh hi par dekhte hi teri surat khul gai

thi asiran-e-qafas ko aarzu parwaz ki

khul gai khiDki qafas ki kya ki qismat khul gai

tere aariz par hua aaKHir ghubar-e-KHat numud

khul gai aaina-ru dil ki kudurat khul gai

be-takalluf aae tum khole hue band-e-qaba

ab girah dil ki hamare fil-haqiqat khul gai

bandhi zahid ne tawakkul par kamar sau bar chust

lekin aaKHir bais-e-susti-e-himmat khul gai

khulte khulte ruk gae wo un ko tu ne ai 'zafar'

sach kaho kis aankh se dekha ki chahat khul gai