zulf khole tha kahan apni wo phir bebak raat

zulf khole thā kahāñ apnī vo phir bebāk raat

ḳhud-ba-ḳhud hotā thā juuñ shāna dil apnā chaak raat

barg-e-gul shabnam se tar mat jāniyo ai bāġhbāñ

gul ne dāman se kiye bulbul ke aañsū paak raat

sham.a raushan juuñ ki aatī hai nazar fānūs meñ

burqe meñ thā jalva-gar vo rū-e-ātishnāk raat

muġhbache ke chūkne se ho gayā saarā ḳhalal

the lagā.e varna rindāñ duḳht-e-raz se taak raat

tū ne bhariyāñ sho.ala-afshāñ aisī hī aa.heñ 'razā'

yaar ke kūche ke jal ga.e sab ḳhas-o-ḳhāshāk raat

zulf khole tha kahan apni wo phir bebak raat

KHud-ba-KHud hota tha jun shana dil apna chaak raat

barg-e-gul shabnam se tar mat jaaniyo ai baghban

gul ne daman se kiye bulbul ke aansu pak raat

shama raushan jun ki aati hai nazar fanus mein

burqe mein tha jalwa-gar wo ru-e-atishnak raat

mughbache ke chukne se ho gaya sara KHalal

the lagae warna rindan duKHt-e-raz se tak raat

tu ne bhariyan shoala-afshan aisi hi aahen 'raza'

yar ke kuche ke jal gae sab KHas-o-KHashak raat