zulf uski meri zunnar hui jati hai

zulf us kī mirī zunnār huī jaatī hai

be-ḳhudī aur mazedār huī jaatī hai

paḌ ga.e chashm-e-sitam-gar ke sharāre ham par

taab zaḳhmoñ kī pur-asrār huī jaatī hai

shukr hai ham ko mohabbat ne bachā.e rakkhā

varna ye duniyā to bīmār huī jaatī hai

vahshatoñ hī kī kashākash kā karishma hai ye

ruuh miTTī kī bhī bedār huī jaatī hai

ābloñ ne jo uḌaa.ī hai hañsī zālim kī

dasht kī ḳhaak bhī gulzār huī jaatī hai

aaj phir us kī tamannāoñ ne āñkheñ kholīñ

aaj vīrānī chaman-zār huī jaatī hai

is adā se vo utar aaya mirī dhaḌkan meñ

zindagī apnī tarahdār huī jaatī hai

ishq ne aisī bulandī kī oḌhā.ī chādar

ab mohabbat mirā kirdār huī jaatī hai

aah kī badlī barastī hai sar-e-shām 'nadīm'

raat ehsās se sarshār huī jaatī hai

zulf us ki meri zunnar hui jati hai

be-KHudi aur mazedar hui jati hai

paD gae chashm-e-sitam-gar ke sharare hum par

tab zaKHmon ki pur-asrar hui jati hai

shukr hai hum ko mohabbat ne bachae rakkha

warna ye duniya to bimar hui jati hai

wahshaton hi ki kashakash ka karishma hai ye

ruh miTTi ki bhi bedar hui jati hai

aablon ne jo uDai hai hansi zalim ki

dasht ki KHak bhi gulzar hui jati hai

aaj phir us ki tamannaon ne aankhen kholin

aaj virani chaman-zar hui jati hai

is ada se wo utar aaya meri dhaDkan mein

zindagi apni tarahdar hui jati hai

ishq ne aisi bulandi ki oDhai chadar

ab mohabbat mera kirdar hui jati hai

aah ki badli barasti hai sar-e-sham 'nadim'

raat ehsas se sarshaar hui jati hai