zulf zanjir-e-pa hui jab se

zulf zanjīr-e-pā huī jab se

ham asīr-e-ma.āsh haiñ tab se

madrasoñ ne banā diyā naukar

umr saarī gañvā.ī is Dhab se

peT kī aag kyoñ nahīñ bujhtī

justujū kar rahe haiñ ham kab se

ham faqat maañg kar hī jiite haiñ

kaash ġhairat bhī maañg leñ rab se

is ko daulat ne kyā uThānā hai

gir gayā jo hayā ke markab se

ḳhatm-e-qur.āñ hai nekiyoñ ke liye

ham ko matlab nahīñ hai matlab se

shaiḳh-o-sūfī uThā ke chañg-o-rubāb

dekh laḌne chale haiñ marhab se

tīrgī meñ jalā ke diip na.e

dushmanī le rahe haiñ ham sab se

tum ujāloñ kī baat mat karnā

tīrgī shah ke saath hai ab se

chhoḌ 'naqqāsh' harf-e-sachchā.ī

log ḳhā.if haiñ tere maz.hab se

zulf zanjir-e-pa hui jab se

hum asir-e-maash hain tab se

madrason ne bana diya naukar

umr sari ganwai is Dhab se

peT ki aag kyon nahin bujhti

justuju kar rahe hain hum kab se

hum faqat mang kar hi jite hain

kash ghairat bhi mang len rab se

is ko daulat ne kya uThana hai

gir gaya jo haya ke markab se

KHatm-e-quran hai nekiyon ke liye

hum ko matlab nahin hai matlab se

shaiKH-o-sufi uTha ke chang-o-rubab

dekh laDne chale hain marhab se

tirgi mein jala ke dip nae

dushmani le rahe hain hum sab se

tum ujalon ki baat mat karna

tirgi shah ke sath hai ab se

chhoD 'naqqash' harf-e-sachchai

log KHaif hain tere mazhab se