zulm jab had se siwa ho to ayan hota hai

zulm jab had se sivā ho to ayaañ hotā hai

dast-e-mazlūm meñ bhī sang-e-girāñ hotā hai

aaheñ bharne ke sivā kuchh na karegā lekin

ik dhamāka hī to tāsīr-e-fuġhāñ hotā hai

jaan kar be-sar-o-sāmān kabhī zulm na kar

saath mazlūm ke ḳhud rabb-e-jahāñ hotā hai

kaun hai vahshī yahāñ kaun hai mazlūm bhalā

us kā aḳhbār meñ har roz bayāñ hotā hai

tinke ban kar yūñhī bah jaate haiñ zālim saare

jab bhī insāf kā sailāb ravāñ hotā hai

vaqt ke aane se pahle hī sañbhal jā varna

ronā-dhonā tirā bilkul hī ziyāñ hotā hai

zulm par ḳhāmushī dānā.ī nahīñ hai 'nādir'

jāntā ḳhuub hai jo ahl-e-zabāñ hotā hai

zulm jab had se siwa ho to ayan hota hai

dast-e-mazlum mein bhi sang-e-giran hota hai

aahen bharne ke siwa kuchh na karega lekin

ek dhamaka hi to tasir-e-fughan hota hai

jaan kar be-sar-o-saman kabhi zulm na kar

sath mazlum ke KHud rabb-e-jahan hota hai

kaun hai wahshi yahan kaun hai mazlum bhala

us ka aKHbar mein har roz bayan hota hai

tinke ban kar yunhi bah jate hain zalim sare

jab bhi insaf ka sailab rawan hota hai

waqt ke aane se pahle hi sanbhal ja warna

rona-dhona tera bilkul hi ziyan hota hai

zulm par KHamushi danai nahin hai 'nadir'

jaanta KHub hai jo ahl-e-zaban hota hai