ظلم کا انجام بھی ظالم کو سمجھائے کوئی

ظلم کا انجام بھی ظالم کو سمجھائے کوئی

صبر کی اک حد ہے یہ بھی اس کو بتلائے کوئی

انفس و آفاق میں موجود ہے اس کی ہی ذات

آدمی کے ذہن تک یہ بات پہنچائے کوئی

خاندانان غلاماں ہر طرف موجود ہیں

ان کے احسانات سے کس طرح بچ پائے کوئی

ڈال کر صدیوں پرانی دھارناؤں پر کفن

سڑ رہی ہیں جو یہ لاشیں ان کو دفنائے کوئی

مرکز و محور یہاں کیول خدا کی ذات ہے

یہ ذرا سی بات آقاؤں کو سمجھائے کوئی

علم دین مصطفیٰ ان کو سکھانے کے لیے

درس گاہوں میں اماموں کو بھی لے جائے کوئی

سر سے لے کر پاؤں تک ڈوبا ہوا ہوں جھوٹ میں

سچ کے ساحل تک مجھے کیا خاک پہنچائے کوئی