zulm ka anjam bhi zalim ko samjhae koi

zulm kā anjām bhī zālim ko samjhā.e koī

sabr kī ik had hai ye bhī us ko batlā.e koī

anfus-o-āfāq meñ maujūd hai us kī hī zaat

aadmī ke zehn tak ye baat pahuñchā.e koī

ḳhāndānān-e-ġhulāmāñ har taraf maujūd haiñ

un ke ehsānāt se kis tarh bach paa.e koī

Daal kar sadiyoñ purānī dhārnāoñ par kafan

saḌ rahī haiñ jo ye lāsheñ un ko dafnā.e koī

markaz-o-mehvar yahāñ keval ḳhudā kī zaat hai

ye zarā sī baat āqāoñ ko samjhā.e koī

'ilm-e-dīn-e-mustafā un ko sikhāne ke liye

dars-gāhoñ meñ imāmoñ ko bhī le jaa.e koī

sar se le kar paañv tak Duubā huā huuñ jhuuT meñ

sach ke sāhil tak mujhe kyā ḳhaak pahuñchā.e koī

zulm ka anjam bhi zalim ko samjhae koi

sabr ki ek had hai ye bhi us ko batlae koi

anfus-o-afaq mein maujud hai us ki hi zat

aadmi ke zehn tak ye baat pahunchae koi

KHandanan-e-ghulaman har taraf maujud hain

un ke ehsanat se kis tarh bach pae koi

Dal kar sadiyon purani dhaarnaon par kafan

saD rahi hain jo ye lashen un ko dafnae koi

markaz-o-mehwar yahan kewal KHuda ki zat hai

ye zara si baat aaqaon ko samjhae koi

'ilm-e-din-e-mustafa un ko sikhane ke liye

dars-gahon mein imamon ko bhi le jae koi

sar se le kar panw tak Duba hua hun jhuT mein

sach ke sahil tak mujhe kya KHak pahunchae koi