zulm karte hue wo shaKHs larazta hi nahin

zulm karte hue vo shaḳhs laraztā hī nahīñ

jaise qahhār ke ma.anī vo samajhtā hī nahīñ

jitnā bhī baañT sako baañT do is daulat ko

ilm ik aisā ḳhazāna hai jo ghaTtā hī nahīñ

hindū miltā hai musalmān bhī īsā.ī bhī

lekin is daur meñ insān to miltā hī nahīñ

merā bachcha bhī alag fikr kā mālik niklā

jo kabhī naqsh-e-qadam dekh ke chaltā hī nahīñ

is qadar sard-mizājī hai musallat ham par

koī bhī baat ho ab ḳhuun ubaltā hī nahīñ

kis tarah utregā āñgan meñ qamar ḳhushiyoñ kā

ġham kā sūraj kabhī dīvār se Dhaltā hī nahīñ

miT nahīñ saktā kabhī dāman-e-tārīḳh se daaġh

ḳhūn-e-mazlūm kabhī rā.egāñ hotā hī nahīñ

zulm karte hue wo shaKHs larazta hi nahin

jaise qahhaar ke mani wo samajhta hi nahin

jitna bhi banT sako banT do is daulat ko

ilm ek aisa KHazana hai jo ghaTta hi nahin

hindu milta hai musalman bhi isai bhi

lekin is daur mein insan to milta hi nahin

mera bachcha bhi alag fikr ka malik nikla

jo kabhi naqsh-e-qadam dekh ke chalta hi nahin

is qadar sard-mizaji hai musallat hum par

koi bhi baat ho ab KHun ubalta hi nahin

kis tarah utrega aangan mein qamar KHushiyon ka

gham ka suraj kabhi diwar se Dhalta hi nahin

miT nahin sakta kabhi daman-e-tariKH se dagh

KHun-e-mazlum kabhi raegan hota hi nahin