ظلم و ستم سے مجھ کو وفا کی تلاش ہے

ظلم و ستم سے مجھ کو وفا کی تلاش ہے

خنجر کے دم سے آب بقا کی تلاش ہے

اے مے کشو ہو تم کو مبارک یہ مے کشی

مجھ کو تو جام ہوش ربا کی تلاش ہے

ہے ساکنان دشت کی سوکھی ہوئی زباں

کانٹوں کو ایک آبلہ پا کی تلاش ہے

کچھ ہو سکا نہ اس کو دواؤں سے فائدہ

بیمار غم کو اب تو قضا کی تلاش ہے

گم کردہ راہ ہوں نہیں معلوم کچھ مجھے

بھٹکے ہوئے کو بانگ درا کی تلاش ہے

میری خطا نہ دیکھ تو اپنے کرم کو دیکھ

تیرے کرم کو اہل خطا کی تلاش ہے

وقت اخیر اشک ندامت نکل پڑے

مرتے ہوئے ذکیؔ کو خدا کی تلاش ہے