zulm-o-sitam se mujhko wafa ki talash hai

zulm-o-sitam se mujh ko vafā kī talāsh hai

ḳhanjar ke dam se āb-e-baqā kī talāsh hai

ai mai-kasho ho tum ko mubārak ye mai-kashī

mujh ko to jām-e-hosh-rubā kī talāsh hai

hai sakinān-e-dasht kī sūkhī huī zabāñ

kāñToñ ko ek ābla-pā kī talāsh hai

kuchh ho sakā na us ko davāoñ se fā.eda

bīmār-e-ġham ko ab to qazā kī talāsh hai

gum-karda-rāh huuñ nahīñ mā'lūm kuchh mujhe

bhaTke hue ko bāñg-e-darā kī talāsh hai

merī ḳhatā na dekh tū apne karam ko dekh

tere karam ko ahl-e-ḳhatā kī talāsh hai

vaqt-e-aḳhīr ashk-e-nadāmat nikal paḌe

marte hue 'zakī' ko ḳhudā kī talāsh hai

zulm-o-sitam se mujh ko wafa ki talash hai

KHanjar ke dam se aab-e-baqa ki talash hai

ai mai-kasho ho tum ko mubarak ye mai-kashi

mujh ko to jam-e-hosh-ruba ki talash hai

hai sakinan-e-dasht ki sukhi hui zaban

kanTon ko ek aabla-pa ki talash hai

kuchh ho saka na us ko dawaon se faeda

bimar-e-gham ko ab to qaza ki talash hai

gum-karda-rah hun nahin ma'lum kuchh mujhe

bhaTke hue ko bang-e-dara ki talash hai

meri KHata na dekh tu apne karam ko dekh

tere karam ko ahl-e-KHata ki talash hai

waqt-e-aKHir ashk-e-nadamat nikal paDe

marte hue 'zaki' ko KHuda ki talash hai