zulmat-e-dahr ka ehsan utara jae

zulmat-e-dahr kā ehsān utārā jaa.e

chāñd se koī falak-zād pukārā jaa.e

chuum kar maañ ke qadam aur duā.eñ le kar

ghar se niklūñ to mire saath sitārā jaa.e

furqat-o-hijr hai kyā dasht-e-judā.ī kyā hai

tum ko ma.alūm ho jab koī tumhārā jaa.e

phir kahīñ baiTh ke pī jaa.e ikaTThe chaa.e

phir koī shaam kā pal saath guzārā jaa.e

tum pe martā hai koī shaḳhs tumhāre jaisā

kyuuñ na us shaḳhs kī ḳhātir tumheñ haarā jaa.e

us kam-āmez ke va.adoñ pe bharosa kar ke

Dar hai phir se dil-e-ḳhush-fahm na maarā jaa.e

kaise tinke ke sahāre ko sahārā samjhūñ

is sahāre se to achchhā hai sahārā jaa.e

ye charāġhoñ ko bujhāne kī ghaḌī hai 'īmāñ'

jis ne ab chhoḌ ke jaanā hai ḳhudārā jaa.e

zulmat-e-dahr ka ehsan utara jae

chand se koi falak-zad pukara jae

chum kar man ke qadam aur duaen le kar

ghar se niklun to mere sath sitara jae

furqat-o-hijr hai kya dasht-e-judai kya hai

tum ko malum ho jab koi tumhaara jae

phir kahin baiTh ke pi jae ikaTThe chae

phir koi sham ka pal sath guzara jae

tum pe marta hai koi shaKHs tumhaare jaisa

kyun na us shaKHs ki KHatir tumhein haara jae

us kam-amez ke wadon pe bharosa kar ke

Dar hai phir se dil-e-KHush-fahm na mara jae

kaise tinke ke sahaare ko sahaara samjhun

is sahaare se to achchha hai sahaara jae

ye charaghon ko bujhane ki ghaDi hai 'iman'

jis ne ab chhoD ke jaana hai KHudara jae