zulmat-e-dasht-e-adam mein bhi agar jaunga

zulmat-e-dasht-e-adam meñ bhī agar jā.ūñgā

le ke ham-rāh mah-e-dāġh-e-jigar jā.ūñgā

āriz-e-gul huuñ na maiñ dīda-e-bulbul gulchīñ

ek jhoñkā huuñ faqat san se guzar jā.ūñgā

ai fanā TuuT sakegī na kabhī kashti-e-umr

maiñ kisī aur samundar meñ utar jā.ūñgā

dekh jī bhar ke magar toḌ na mujh ko gulchīñ

haath bhī tū ne lagāyā to bikhar jā.ūñgā

ek qatra huuñ magar sail-e-mohabbat se tire

ho sake jo na samundar se bhī kar jā.ūñgā

duur gulshan se kisī dasht meñ le jā sayyād

ham-safīroñ ke tarānoñ meñ to mar jā.ūñgā

sehn-e-gulshan meñ ka.ī daam bichhe haiñ ai 'asar'

uḌ ke jā.ūñ bhī agar maiñ to kidhar jā.ūñgā

zulmat-e-dasht-e-adam mein bhi agar jaunga

le ke ham-rah mah-e-dagh-e-jigar jaunga

aariz-e-gul hun na main dida-e-bulbul gulchin

ek jhonka hun faqat san se guzar jaunga

ai fana TuT sakegi na kabhi kashti-e-umr

main kisi aur samundar mein utar jaunga

dekh ji bhar ke magar toD na mujh ko gulchin

hath bhi tu ne lagaya to bikhar jaunga

ek qatra hun magar sail-e-mohabbat se tere

ho sake jo na samundar se bhi kar jaunga

dur gulshan se kisi dasht mein le ja sayyaad

ham-safiron ke taranon mein to mar jaunga

sehn-e-gulshan mein kai dam bichhe hain ai 'asar'

uD ke jaun bhi agar main to kidhar jaunga