zulmat-e-shab ne kiya chaak gareban apna

zulmat-e-shab ne kiyā chaak garebāñ apnā

vo huī sub.h vo ruḳhsat huā mehmāñ apnā

baḌh ga.ī aur bhī pahle se sivā vahshat-e-dil

kūcha-e-zulf huā jab se bayābāñ apnā

vaq.at-e-ishq-e-butāñ ham se to pūchhe koī

diin apnā hai yahī aur hai īmāñ apnā

laakh samjhāte haiñ bahlāte haiñ phuslāte haiñ

kabhī suntā nahīñ un kī dil-e-nādāñ apnā

saikḌoñ ġham haiñ hameñ saikḌoñ āzār hameñ

ab ḳhudā hī hai mohabbat meñ nigahbāñ apnā

sun ke tamhīd-e-mohabbat hī vo nārāz hue

kahne paa.e the na ham hāl-e-pareshāñ apnā

phuul murjhā ga.e baaqī na rahā rang-e-bahār

bāġhbāñ dekh ke rotā hai gulistāñ apnā

apnī sūrat kā nazārā hameñ kar lene do

dil kiye dete haiñ sau jaan se qurbāñ apnā

dekh kar ham ko sar-e-bazm vo haiñ teġh-ba-kaf

ab kuchh achchhā nazar aatā nahīñ sāmāñ apnā

girya-e-dīda-e-ushshāq ko jab dekheñge

hazrat-e-nūh ko yaad aa.egā tūfāñ apnā

kyā dikhā.eñge vo muñh jā ke ḳhudā ko 'hāmid'

dil butoñ se jo lagāte haiñ musalmāñ apnā

zulmat-e-shab ne kiya chaak gareban apna

wo hui subh wo ruKHsat hua mehman apna

baDh gai aur bhi pahle se siwa wahshat-e-dil

kucha-e-zulf hua jab se bayaban apna

waqat-e-ishq-e-butan hum se to puchhe koi

din apna hai yahi aur hai iman apna

lakh samjhate hain bahlate hain phuslate hain

kabhi sunta nahin un ki dil-e-nadan apna

saikDon gham hain hamein saikDon aazar hamein

ab KHuda hi hai mohabbat mein nigahban apna

sun ke tamhid-e-mohabbat hi wo naraaz hue

kahne pae the na hum haal-e-pareshan apna

phul murjha gae baqi na raha rang-e-bahaar

baghban dekh ke rota hai gulistan apna

apni surat ka nazara hamein kar lene do

dil kiye dete hain sau jaan se qurban apna

dekh kar hum ko sar-e-bazm wo hain tegh-ba-kaf

ab kuchh achchha nazar aata nahin saman apna

girya-e-dida-e-ushshaq ko jab dekhenge

hazrat-e-nuh ko yaad aaega tufan apna

kya dikhaenge wo munh ja ke KHuda ko 'hamid'

dil buton se jo lagate hain musalman apna