zulmaton ki sahar nahin aati

zulmatoñ kī sahar nahīñ aatī

aarzū koī bar nahīñ aatī

ḳhud-nigar vo haiñ aur ham ḳhud.dār

bigḌī bantī nazar nahīñ aatī

nau-giraftār-e-dām-e-ulfat haiñ

aah bhī karnī sar nahīñ aatī

mulk-o-millat bhī ho chuke nīlām

ham ko ġhairat magar nahīñ aatī

arsh se bekasoñ kī aah kabhī

lauT kar be-asar nahīñ aatī

aib-e-aġhyār par hai sab kī nazar

apnī sūrat nazar nahīñ aatī

vaqt kī tarah phir mire hamdam

zindagī lauT kar nahīñ aatī

aadmī aadmī kā shor bahut

ādamiyyat nazar nahīñ aatī

muttahid hoñ jo apne begāne

kyoñ vo sūrat nazar nahīñ aatī

haif 'gulzār' mulk-o-millat meñ

ab nasīm-e-sahar nahīñ aatī

zulmaton ki sahar nahin aati

aarzu koi bar nahin aati

KHud-nigar wo hain aur hum KHuddar

bigDi banti nazar nahin aati

nau-giraftar-e-dam-e-ulfat hain

aah bhi karni sar nahin aati

mulk-o-millat bhi ho chuke nilam

hum ko ghairat magar nahin aati

arsh se bekason ki aah kabhi

lauT kar be-asar nahin aati

aib-e-aghyar par hai sab ki nazar

apni surat nazar nahin aati

waqt ki tarah phir mere hamdam

zindagi lauT kar nahin aati

aadmi aadmi ka shor bahut

aadamiyyat nazar nahin aati

muttahid hon jo apne begane

kyon wo surat nazar nahin aati

haif 'gulzar' mulk-o-millat mein

ab nasim-e-sahar nahin aati