اب کے مایوس ہی لوٹا ہے کھلونے والا

اب کے مایوس ہی لوٹا ہے کھلونے والا

ایک بچہ نہ ملا گاؤں میں رونے والا

کم سے کم قتل کا منظر تو نہ دیکھا اس نے

جاگنے والوں سے اچھا رہا سونے والا

ماں کے آنچل پہ ہیں بچوں کے لہو کے چھینٹے

کوئی آنسو نہیں اس داغ کو دھونے والا

ہم تو آرام سے پتھر پہ بھی سو جاتے ہیں

گولیاں نیند کی کھاتا ہے بچھونے والا

یہ قلم اور یہ کتابیں یہ سماج اور کنبہ

ہے تری طرح کوئی بوجھ کو ڈھونے والا

جستجو پھولوں کو کیسے نہ کرنؔ کی ہوتی

وہ تھا پیراہن موسم کو بھگونے والا