ab kisi ko bhi nazar aati nahin koi darar

ab kisī ko bhī nazar aatī nahīñ koī darār

ghar kī har dīvār par chipke haiñ itne ishtihār

aap bach kar chal sakeñ aisī koī sūrat nahīñ

rahguzar ghere hue murde khaḌe haiñ be-shumār

roz aḳhbāroñ meñ paḌh kar ye ḳhayāl aayā hameñ

is taraf aatī to ham bhī dekhte fasl-e-bahār

maiñ bahut kuchh sochtā rahtā huuñ par kahtā nahīñ

bolnā bhī hai manā sach bolnā to darkinār

is sire se us sire tak sab sharīk-e-jurm haiñ

aadmī yā to zamānat par rihā hai yā farār

hālat-e-insān par barham na hoñ ahl-e-vatan

vo kahīñ se zindagī bhī maañg lā.eñge udhār

raunaq-e-jannat zarā bhī mujh ko raas aa.ī nahīñ

maiñ jahannam meñ bahut ḳhush thā mire parvardigār

dastakoñ kā ab kivāḌoñ par asar hogā zarūr

har hathelī ḳhuun se tar aur zyāda be-qarār

ab kisi ko bhi nazar aati nahin koi darar

ghar ki har diwar par chipke hain itne ishtihaar

aap bach kar chal saken aisi koi surat nahin

rahguzar ghere hue murde khaDe hain be-shumar

roz aKHbaron mein paDh kar ye KHayal aaya hamein

is taraf aati to hum bhi dekhte fasl-e-bahaar

main bahut kuchh sochta rahta hun par kahta nahin

bolna bhi hai mana sach bolna to darkinar

is sire se us sire tak sab sharik-e-jurm hain

aadmi ya to zamanat par riha hai ya farar

haalat-e-insan par barham na hon ahl-e-watan

wo kahin se zindagi bhi mang laenge udhaar

raunaq-e-jannat zara bhi mujh ko ras aai nahin

main jahannam mein bahut KHush tha mere parwardigar

dastakon ka ab kiwaDon par asar hoga zarur

har hatheli KHun se tar aur zyaada be-qarar