ایسا شخص کہاں ملتا ہے اپنا بھی بیگانہ بھی

ایسا شخص کہاں ملتا ہے اپنا بھی بیگانہ بھی

ایک جگہ جیسے مل جائے دنیا بھی ویرانہ بھی

میرے اندر سب رہتے ہیں رستے منزل اور پڑاؤ

میں نے تو خود ہی سیکھا ہے چلنا بھی رک جانا بھی

مڑ جاتی ہیں راہیں اکثر ان چاہے سناٹوں تک

مشکل ہو جاتا ہے تب کچھ کہنا بھی سن پانا بھی

جیسے جیسے وہ ملتا ہے جیسے گم ہو جاتا ہے

کھونا بھی اس کو ویسے ہی پانا بھی اپنانا بھی

جڑتا بھی رہتا ہے مجھ سے گھٹتا بھی رہتا ہے کچھ

ہر لمحہ ہوتا رہتا ہے جینا بھی مر جانا بھی

کل تک سایہ تھا جو میرا مجھ سے بچھڑا دھوپ بنا

دھوپ بنا تو سیکھ گیا وہ اگنا بھی ڈھل جانا بھی

چھوڑ گیا وہ کچھ آوازیں میں نے جن کو باندھ لیا

باندھ لیا اس کے ہونٹوں کا کھلنا بھی مرجھانا بھی