اندھیرے میں ہم آپ ہیں روشنی میں

اندھیرے میں ہم آپ ہیں روشنی میں

بڑا فرق ہے زندگی زندگی میں

صداقت اگر عیب ہے آدمی میں

تو حق دار کیا کچھ نہ سوچیں گے جی میں

وہ اتھلی سیاست کا دم بھر رہے ہیں

جنہیں ڈوب مرنا تھا گہری ندی میں

نشیمن ہوا نذر برق بہاراں

مگر گلستاں آ گیا روشنی میں

غریبوں کے دل کی تو میں جانتا ہوں

پکے جیسے لاوا جوالا مکھی میں

کہیں رہ نہ جائے مشینوں کی دنیا

کہیں آدمی آ نہ جائے کمی میں

جو تم نے پڑھا ہے وہ ہم نے گنا ہے

بڑی چیز ہے تجربہ آگاہی میں

وہ رنگیں نوائی یہ شعلہ بیانی

کئی موڑ آئے مری شاعری میں

حقیقت یہ ہے شادؔ کی ہر غزل سے

اضافہ ہوا آپ کی آگاہی میں