درد جب تک سوالات کرتے رہے

درد جب تک سوالات کرتے رہے

ہم درختوں کے سنگ بات کرتے رہے

زندگی سے ملیں گالیاں اور ہم

روز اس سے ملاقات کرتے رہے

لوگ سوتے رہے چادریں تان کر

جنگ ہم سے خیالات کرتے رہے

ہم نہ بولے کبھی وہ نہ سمجھے کبھی

بے وجہ خون جذبات کرتے رہے

روشنی وہ طوائف کہ جس کے لیے

خوش نما عمر کو رات کرتے رہے

بے وجہ رو دیے بے وجہ ہنس دیے

رات دن یہ خرافات کرتے رہے

ہم جھکے تو نہیں یہ تمنا مگر

اک زمانے سے حالات کرتے رہے