گھٹن کے ساتھ تو جائے گا ان گھروں میں کہاں

گھٹن کے ساتھ تو جائے گا ان گھروں میں کہاں

کھلی فضا میں جو راحت ہے بستیوں میں کہاں

اتر چکی ہے جو کاغذ پہ اپنے رنگوں میں

چھپی ہوئی تھی وہ تصویر انگلیوں میں کہاں

گھنے درخت ہیں اس راہ سے تو دن میں گزر

ہوئی جو رات تو بھٹکے گا جنگلوں میں کہاں

سفید پیڑ بہت جلد ہو گئے اونچے

جو کل ملے تھے وہ منظر بھی راستوں میں کہاں

ہری زمین پہ تو نے عمارتیں بو دیں

ملے گی تازہ ہوا تجھ کو پتھروں میں کہاں

یہ رت جگے یہ عبادت تو ان کا پیشہ ہے

بھٹک رہا ہے نگر ان کے رتجگوں میں کہاں

اسے نظام نے اپنا بنا لیا یارو

اب اس کا نام عدالت کے کاغذوں میں کہاں