humne mana ki mahka ke ghar rakh diya

ham ne maanā ki mahkā ke ghar rakh diyā

kitne phūloñ kā sar kaaT kar rakh diyā

tum mire paas ho raat hairān hai

chāñd kis ne idhar kā udhar rakh diyā

ek lamhe ko sūraj Thahar sā gayā

haath us ne mire haath par rakh diyā

de ke kastūrī hirnoñ kī taqdīr meñ

pyaas kā ek lambā safar rakh diyā

tum ne ye kyā kiyā battiyoñ kī jagah

in charāġhoñ meñ āñdhī kā Dar rakh diyā

apnā chehrā na poñchhā gayā aap se

ā.īna be-vajah toḌ kar rakh diyā

āḳhirī faisla vaqt ke haath hai

sach ne talvār ke aage sar rakh diyā

dene vaale ye hassās nāzuk sā dil

mere siine meñ kyuuñ ḳhaas kar rakh diyā

tum 'uday' chiiz kyā ho ki is pyaar ne

devtāoñ kā dil toḌ kar rakh diyā

hum ne mana ki mahka ke ghar rakh diya

kitne phulon ka sar kaT kar rakh diya

tum mere pas ho raat hairan hai

chand kis ne idhar ka udhar rakh diya

ek lamhe ko suraj Thahar sa gaya

hath us ne mere hath par rakh diya

de ke kasturi hirnon ki taqdir mein

pyas ka ek lamba safar rakh diya

tum ne ye kya kiya battiyon ki jagah

in charaghon mein aandhi ka Dar rakh diya

apna chehra na ponchha gaya aap se

aaina be-wajah toD kar rakh diya

aaKHiri faisla waqt ke hath hai

sach ne talwar ke aage sar rakh diya

dene wale ye hassas nazuk sa dil

mere sine mein kyun KHas kar rakh diya

tum 'uday' chiz kya ho ki is pyar ne

dewtaon ka dil toD kar rakh diya