ہم پر دکھ کا پربت ٹوٹا تب ہم نے دو چار کہے

ہم پر دکھ کا پربت ٹوٹا تب ہم نے دو چار کہے

اس پہ بھلا کیا بیتی ہوگی جس نے شیر ہزار کہے

ہمیں ذرا بن واس کاٹنا پڑا اگر کچھ دن تو کیا

اس کی سوچو جو جنگل کو ہی اپنا گھر بار کہے

سیدھے سچے لوگوں کے دم پر ہی دنیا چلتی ہے

ہم کیسے اس بات کو مانیں کہنے کو سنسار کہے

اپنا اپنا مال سجائے سب بازار میں آ بیٹھے

کوئی اسے کہے مجبوری کوئی کاروبار کہے

شعر وہی ہیں شعر جو راہیؔ لکھے خون یا آنسو سے

باقی تو بس الم گلم کہے مگر بے کار کہے