جو نظر نظر سے ملا سکے مجھے اس نظر کی تلاش ہے

جو نظر نظر سے ملا سکے مجھے اس نظر کی تلاش ہے

ہوئی جس سے کوئی خطا نہیں مجھے اس بشر کی تلاش ہے

مری زندگی کے سکھ اور دکھ یہ تو رات دن کی طرح سے ہیں

جو نہ پہنچے شام تلک کبھی مجھے اس سحر کی تلاش ہے

مجھے لگ رہا ہے کہ نا خدا نہیں اپنے ہوش و حواس میں

جو سفینہ پار لگا سکے اسی با ہنر کی تلاش ہے

کئی موڑ آئے حیات میں کبھی سکھ ملا کبھی دکھ ملا

میں ہوں آج ایسے مقام پر جہاں دیدہ ور کی تلاش ہے

کئے میں نے کتنے گناہ ہیں نہیں اس کا کوئی حساب ہے

جو معاف پھر بھی مجھے کرے کسی اس نظر کی تلاش ہے

میں بھٹک رہا ہوں ادھر ادھر کبھی اس کے در کبھی اس کے در

جو ملا سکے مجھے مجھ ہی سے اسی راہ بر کی تلاش ہے