kabhi peDon ko bhi chhuTTi diya kar

kabhī peḌoñ ko bhī chhuTTī diyā kar

havā tū bhī kabhī paidal chalā kar

maiñ sang-e-mīl ho ke rah na jā.ūñ

safar kī gard ko apnā banā kar

baġhāvat dum hilātī aa ga.ī phir

ise chaltā karo kuchh de dilā kar

saḌak par jab kabhī chalnā ho tujh ko

kaleja haath meñ le kar chalā kar

maiñ kyā sūraj nayā paidā karūñgā

baḌā jo bhī banā hai zulm Dhā kar

nazar kī ḳhairiyat gar chāhtā ho

ujāle se añdhere meñ milā kar

gaḌhī hai vaqt kī tasvīr maiñ ne

samay kī aañch meñ sapne galā kar

ḳharāTe bhar rahe the raat ko tum

maiñ jab aa.ī thī bachche ko sulā kar

kabhi peDon ko bhi chhuTTi diya kar

hawa tu bhi kabhi paidal chala kar

main sang-e-mil ho ke rah na jaun

safar ki gard ko apna bana kar

baghawat dum hilati aa gai phir

ise chalta karo kuchh de dila kar

saDak par jab kabhi chalna ho tujh ko

kaleja hath mein le kar chala kar

main kya suraj naya paida karunga

baDa jo bhi bana hai zulm Dha kar

nazar ki KHairiyat gar chahta ho

ujale se andhere mein mila kar

gaDhi hai waqt ki taswir main ne

samay ki aanch mein sapne gala kar

KHaraTe bhar rahe the raat ko tum

main jab aai thi bachche ko sula kar