kahan to tai tha charaghan har ek ghar ke liye

kahāñ to tai thā charāġhāñ har ek ghar ke liye

kahāñ charāġh mayassar nahīñ shahar ke liye

yahāñ daraḳhtoñ ke saa.e meñ dhuup lagtī hai

chaleñ yahāñ se chaleñ aur umr bhar ke liye

na ho qamīz to paañv se peT Dhak leñge

ye log kitne munāsib haiñ is safar ke liye

ḳhudā nahīñ na sahī aadmī kā ḳhvāb sahī

koī hasīn nazārā to hai nazar ke liye

vo mutma.in haiñ ki patthar pighal nahīñ saktā

maiñ be-qarār huuñ āvāz meñ asar ke liye

tirā nizām hai sil de zabān-e-shā.er ko

ye ehtiyāt zarūrī hai is bahar ke liye

ji.eñ to apne baġhaicha meñ gul-muhar ke tale

mareñ to ġhair kī galiyoñ meñ gul-muhar ke liye

kahan to tai tha charaghan har ek ghar ke liye

kahan charagh mayassar nahin shahar ke liye

yahan daraKHton ke sae mein dhup lagti hai

chalen yahan se chalen aur umr bhar ke liye

na ho qamiz to panw se peT Dhak lenge

ye log kitne munasib hain is safar ke liye

KHuda nahin na sahi aadmi ka KHwab sahi

koi hasin nazara to hai nazar ke liye

wo mutmain hain ki patthar pighal nahin sakta

main be-qarar hun aawaz mein asar ke liye

tera nizam hai sil de zaban-e-shaer ko

ye ehtiyat zaruri hai is bahar ke liye

jien to apne baghaicha mein gul-muhar ke tale

maren to ghair ki galiyon mein gul-muhar ke liye