کیسے منظر سامنے آنے لگے ہیں

کیسے منظر سامنے آنے لگے ہیں

گاتے گاتے لوگ چلانے لگے ہیں

اب تو اس تالاب کا پانی بدل دو

یہ کنول کے پھول کمہلانے لگے ہیں

وہ صلیبوں کے قریب آئے تو ہم کو

قاعدے قانون سمجھانے لگے ہیں

ایک قبرستان میں گھر مل رہا ہے

جس میں تہہ خانوں سے تہہ خانے لگے ہیں

مچھلیوں میں کھلبلی ہے اب سفینے

اس طرف جانے سے کترانے لگے ہیں

مولوی سے ڈانٹ کھا کر اہل مکتب

پھر اسی آیات کو دہرانے لگے ہیں

اب نئی تہذیب کے پیش نظر ہم

آدمی کو بھون کر کھانے لگے ہیں