کیا ضروری ہے کہ ہو تیوہار کی ہر روشنی

کیا ضروری ہے کہ ہو تیوہار کی ہر روشنی

آگ لگنے سے بھی ہو جاتی ہے اکثر روشنی

کھڑکیوں کو بند رکھنے کا مزا ہم پا گئے

دے کے دستک پھر گئی باہر کی باہر روشنی

شرط یہ ہے سونپ دیں ہم اپنی بینائی انہیں

پھر تو وہ دیتے رہیں گے زندگی بھر روشنی

راستہ تو ایک ہی تھا یہ کدھر سے آ گئے

بچھ گئی کیوں ان کے نیچے بن کے چادر روشنی

صبح آ جاتی ہے جیسے اژدہے کے پیٹ میں

رات ہوتی ہے تو ہوتی ہے میسر روشنی

اپنی سازش میں ہوائیں ہو گئیں پھر کامیاب

رہ گئی پھر بادلوں کے بیچ پھنس کر روشنی

خود چمکتے ہیں ہمیشہ رات کی پا کر پناہ

یہ ستارے کیا بھلا بانٹیں گے گھر گھر روشنی

یوں سوا نیزے پہ سورج تو کبھی پہلے نہ تھا

تھی مگر پہلے نہ تھی اتنی بھینکر روشنی

ہم دلوں سے دل ملاتے ہیں نگاہوں سے نگاہ

روشنی سے کر رہے ہیں ہم اجاگر روشنی