kya zaruri hai ki ho tyauhaar ki har raushni

kyā zarūrī hai ki ho tyauhār kī har raushnī

aag lagne se bhī ho jaatī hai aksar raushnī

khiḌkiyoñ ko band rakhne kā mazā ham pā ga.e

de ke dastak phir ga.ī bāhar kī bāhar raushnī

shart ye hai sauñp deñ ham apnī bīnā.ī unheñ

phir to vo dete raheñge zindagī bhar raushnī

rāsta to ek hī thā ye kidhar se aa ga.e

bichh ga.ī kyuuñ un ke nīche ban ke chādar raushnī

sub.h aa jaatī hai jaise azhdahe ke peT meñ

raat hotī hai to hotī hai mayassar raushnī

apnī sāzish meñ havā.eñ ho ga.iiñ phir kāmyāb

rah ga.ī phir bādaloñ ke biich phañs kar raushnī

ḳhud chamakte haiñ hamesha raat kī pā kar panāh

ye sitāre kyā bhalā bāñTeñge ghar ghar raushnī

yuuñ savā-neze pe sūraj to kabhī pahle na thā

thī magar pahle na thī itnī bhayankar raushnī

ham diloñ se dil milāte haiñ nigāhoñ se nigāh

raushnī se kar rahe haiñ ham ujāgar raushnī

kya zaruri hai ki ho tyauhaar ki har raushni

aag lagne se bhi ho jati hai aksar raushni

khiDkiyon ko band rakhne ka maza hum pa gae

de ke dastak phir gai bahar ki bahar raushni

shart ye hai saunp den hum apni binai unhen

phir to wo dete rahenge zindagi bhar raushni

rasta to ek hi tha ye kidhar se aa gae

bichh gai kyun un ke niche ban ke chadar raushni

subh aa jati hai jaise azhdahe ke peT mein

raat hoti hai to hoti hai mayassar raushni

apni sazish mein hawaen ho gain phir kaamyab

rah gai phir baadalon ke bich phans kar raushni

KHud chamakte hain hamesha raat ki pa kar panah

ye sitare kya bhala banTenge ghar ghar raushni

yun sawa-neze pe suraj to kabhi pahle na tha

thi magar pahle na thi itni bhayankar raushni

hum dilon se dil milate hain nigahon se nigah

raushni se kar rahe hain hum ujagar raushni