مشکلیں تھم گئیں درد کم ہو گیا

مشکلیں تھم گئیں درد کم ہو گیا

اب زمانے کا غم اپنا غم ہو گیا

راستے نے مسافر سے کیا کہہ دیا

انقلاب سفر ہر قدم ہو گیا

جب کٹے ہاتھ بھی لے کے پرچم اڑے

تک ستم گر نے سمجھا ستم ہو گیا

جس قلم نے لکھا انقلاباً الف

وہ قلم سر نہ تھا سر قلم ہو گیا

روشنی اب اندھیرے کی ہم راز ہے

جو نہ ہوتا تھا وہ ایک دم ہو گیا

ذہن سے زیست تک سرخ رو تھا مگر

خواب آنکھوں میں اترا تو نم ہو گیا

وقت تو آسماں کو جھکا دیتا ہے

سر تو سر ہی ہے تھوڑا سا خم ہو گیا

میرے بعد آنے والوں سے کہنا شلبھؔ

ایک بیگانہ دنیا میں کم ہو گیا