mushkilen tham gain dard kam ho gaya

mushkileñ tham ga.iiñ dard kam ho gayā

ab zamāne kā ġham apnā ġham ho gayā

rāste ne musāfir se kyā kah diyā

inqalāb-e-safar har qadam ho gayā

jab kaTe haath bhī le ke parcham uḌe

tuk sitamgar ne samjhā sitam ho gayā

jis qalam ne likhā inqilāban alif

vo qalam sar na thā sar qalam ho gayā

raushnī ab añdhere kī hamrāz hai

jo na hotā thā vo ek dam ho gayā

zehn se ziist tak surḳh-rū thā magar

ḳhvāb āñkhoñ meñ utrā to nam ho gayā

vaqt to āsmāñ ko jhukā detā hai

sar to sar hī hai thoḌā sā ḳham ho gayā

mere ba.ad aane vāloñ se kahnā 'shalabh'

ek begāna duniyā meñ kam ho gayā

mushkilen tham gain dard kam ho gaya

ab zamane ka gham apna gham ho gaya

raste ne musafir se kya kah diya

inqalab-e-safar har qadam ho gaya

jab kaTe hath bhi le ke parcham uDe

tuk sitamgar ne samjha sitam ho gaya

jis qalam ne likha inqilaban alif

wo qalam sar na tha sar qalam ho gaya

raushni ab andhere ki hamraaz hai

jo na hota tha wo ek dam ho gaya

zehn se zist tak surKH-ru tha magar

KHwab aankhon mein utra to nam ho gaya

waqt to aasman ko jhuka deta hai

sar to sar hi hai thoDa sa KHam ho gaya

mere baad aane walon se kahna 'shalabh'

ek begana duniya mein kam ho gaya