نظر کے تصرف سے قائم ہیں سارے

نظر کے تصرف سے قائم ہیں سارے

یہ دھرتی کے چہرے فلک کے نظارے

کوئی خوف قدموں کی زنجیر بن کر

اسے کہہ رہا تھا کنارے کنارے

زمان و مکاں کی خبر ہے یہ ہستی

حقیقت نے ڈھونڈے ہیں کیا استعارے

میرے جسم سے میری پہچان کیا ہو

یہ کپڑے کئی بار پہنے اتارے

کھلی آنکھ کی نیند سب سو رہے ہیں

نظارے کہاں رہ گئے ہیں نظارے

محبت کی موجیں اگر درمیاں ہیں

تو پھر دور کیوں ہیں ندی کے کنارے

ابھی دھوپ رخصت ہوئی ہی تھی تنہاؔ

کوئی آ گیا ساتھ لے کر ستارے