نظر نواز نظارہ بدل نہ جائے کہیں

نظر نواز نظارہ بدل نہ جائے کہیں

ذرا سی بات ہے منہ سے نکل نہ جائے کہیں

وہ دیکھتے ہیں تو لگتا ہے نیو ہلتی ہے

مرے بیان کو بندش نگل نہ جائے کہیں

یوں مجھ کو خود پہ بہت اعتبار ہے لیکن

یہ برف آنچ کے آگے پگھل نہ جائے کہیں

چلے ہوا تو کواڑوں کو بند کر لینا

یہ گرم راکھ شراروں میں ڈھل نہ جائے کہیں

تمام رات ترے مے کدے میں مے پی ہے

تمام عمر نشے میں نکل نہ جائے کہیں

کبھی مچان پہ چڑھنے کی آرزو ابھری

کبھی یہ ڈر کہ یہ سیڑھی پھسل نہ جائے کہیں

یہ لوگ ہومو ہون میں یقین رکھتے ہیں

چلو یہاں سے چلیں ہاتھ جل نہ جائے کہیں