پھولوں کا اپنا کوئی پریوار نہیں ہوتا

پھولوں کا اپنا کوئی پریوار نہیں ہوتا

خوشبو کا اپنا کوئی گھر دوار نہیں ہوتا

ہم گزرے کل کی آنکھوں کا سپنا ہی تو ہیں

کیوں مانیں سپنا کوئی ساکار نہیں ہوتا

اس دنیا میں اچھے لوگوں کا ہی بہومت ہے

ایسا اگر نہ ہوتا یہ سنسار نہیں ہوتا

کتنے ہی اچھے ہوں کاغذ پانی کے رشتے

کاغذ کی ناؤ سے دریا پار نہیں ہوتا

ہمت ہارے تو سب کچھ نا ممکن لگتا ہے

ہمت کر لیں تو کچھ بھی دشوار نہیں ہوتا

وے دیواریں گھر جیسا سمان نہیں پاتیں

جن میں کوئی کھڑکی کوئی دوار نہیں ہوتا