روشنی کا نہ دھوئیں کا ہی پتا دیتا ہے

روشنی کا نہ دھوئیں کا ہی پتا دیتا ہے

کوئی خوابوں کے محل یوں بھی جلا دیتا ہے

آ کہ پھر عہد ملاقات کی تجدید کریں

اتنی جلدی کوئی اپنوں کو بھلا دیتا ہے

ہم کہاں جائیں گے جذبات کا شیشہ لے کر

لفظ پتھر کا تو ہر شخص چلا دیتا ہے

ان کی آنکھوں کے سمندر پہ ذرا غور کرو

دو کناروں کو جو آپس میں ملا دیتا ہے

دل وہ ٹوٹا ہوا مندر ہے کسی بستی کا

جس کو خود اس کا پجاری ہی گرا دیتا ہے

ہم نے تو گھر کی وہ دیوار بھی اونچی کر دی

اب تو بے کار وہ شہرتؔ کو صدا دیتا ہے