سوچ خود ہی میں کہ تو آپے سے باہر کون ہے

سوچ خود ہی میں کہ تو آپے سے باہر کون ہے

ہے غلط فہمی تجھے تیرے برابر کون ہے

رکھوں سر گودی میں اس کی اور آنکھیں میچ لوں

پھر کروں محسوس میرے دل کے اندر کون ہے

جل میں جل مل جائے گا تو کون یہ بتلائے گا

اس میں دریا کون سا ہے اور سمندر کون ہے

جب پڑوسی نے ہی میرے مجھ سے نظریں پھیر لیں

تو مجھے آواز دینے والا در پر کون ہے

وہ گھڑی بھی آئے گی جب یہ پتہ چل جائے گا

ہم میں شیشہ کون سا ہے اور پتھر کون ہے

یہ پتا کرنا ہے مشکل دوستوں کی بھیڑ میں

دشمن جاں کون ہے اور میرا دل بر کون ہے