سورج ہے آسماں پہ اجالا زمین پر

سورج ہے آسماں پہ اجالا زمین پر

ہے آسماں کا آج بھی پہرا زمین پر

آیا تھا کل جو خلد سے آدم کی شکل میں

دکھتا نہیں ہے آج وہ چہرہ زمین پر

قدرت کے انتظام کو تقسیم کر دیا

ہم نے بنا کے ملکوں کا نقشہ زمین پر

دنیا سے ہی تو ملتا ہے جنت کا راستہ

دکھتا نہیں ہے ویسے تو زینہ زمین پر

ہم سے تو دیکھ بھال بھی اس کی نہ ہو سکی

پرکھے اتار لائے تھے گنگا زمین پر

ہے مرغ کو گمان کہ اس کی ہی بانگ سے

ہوتا ہے روز ایک سویرا زمین پر