suraj hai aasman pe ujala zamin par

sūraj hai āsmāñ pe ujālā zamīn par

hai āsmāñ kā aaj bhī pahrā zamīn par

aayā thā kal jo ḳhuld se aadam kī shakl meñ

dikhtā nahīñ hai aaj vo chehra zamīn par

qudrat ke intizām ko taqsīm kar diyā

ham ne banā ke mulkoñ kā naqsha zamīn par

duniyā se hī to miltā hai jannat kā rāsta

dikhtā nahīñ hai vaise to ziina zamīn par

ham se to dekh bhaal bhī us kī na ho sakī

purkhe utaar laa.e the gangā zamīn par

hai murġh ko gumān ki us kī hī baañg se

hotā hai roz ek saverā zamīn par

suraj hai aasman pe ujala zamin par

hai aasman ka aaj bhi pahra zamin par

aaya tha kal jo KHuld se aadam ki shakl mein

dikhta nahin hai aaj wo chehra zamin par

qudrat ke intizam ko taqsim kar diya

hum ne bana ke mulkon ka naqsha zamin par

duniya se hi to milta hai jannat ka rasta

dikhta nahin hai waise to zina zamin par

hum se to dekh bhaal bhi us ki na ho saki

purkhe utar lae the ganga zamin par

hai murgh ko guman ki us ki hi bang se

hota hai roz ek sawera zamin par