tumhaare zehn mein gar khalbali hai

tumhāre zehn meñ gar khalbalī hai

bahut pur-lutf phir ye zindagī hai

ajab ye daur aayā hai ki jis meñ

ġhalat kuchh bhī nahīñ sab kuchh sahī hai

musalsal tīrgī meñ jī rahe haiñ

ye kaisī raushnī ham ko milī hai

mukammal ḳhud ko jo bhī māntā hai

yaqīñ maan.e bahut us meñ kamī hai

judā tum bhiiḌ se hokar to dekho

alag rāhoñ meñ kitnī dilkashī hai

samundar pī rahā hai har nadī ko

kaho ye hai havas yā tishnagī hai

nahīñ aatī hai 'nīraj' haath jo bhī

har ik vo chiiz lagtī qīmtī hai

tumhaare zehn mein gar khalbali hai

bahut pur-lutf phir ye zindagi hai

ajab ye daur aaya hai ki jis mein

ghalat kuchh bhi nahin sab kuchh sahi hai

musalsal tirgi mein ji rahe hain

ye kaisi raushni hum ko mili hai

mukammal KHud ko jo bhi manta hai

yaqin mane bahut us mein kami hai

juda tum bhiD se hokar to dekho

alag rahon mein kitni dilkashi hai

samundar pi raha hai har nadi ko

kaho ye hai hawas ya tishnagi hai

nahin aati hai 'niraj' hath jo bhi

har ek wo chiz lagti qimti hai