yahi aawaz ka mausam hai na Talo mujhko

yahī āvāz kā mausam hai na Taalo mujh ko

kuchh javāboñ se nipaTne do savālo mujh ko

maiñ kharā sikka huuñ jab chāhe chalā lo mujh ko

sar-e-bāzār na rah rah ke uchhālo mujh ko

aa.ine aaj kī tahzīb ke sab patthar haiñ

phir se DhūñDo mire maazī ke havālo mujh ko

maiñ na āġhāz na anjām na paikar kā asiir

jānte hī nahīñ tum jānñe vaalo mujh ko

koī to haq hai añdheroñ kā bhī mujh par āḳhir

phir kisī soch meñ Dhalne do ujālo mujh ko

ġham-e-āfāq se nipTūñ to maiñ ḳhud kī sochūñ

apnā ehsās kahāñ chāhne vaalo mujh ko

merā kyā hai maiñ to ehsās kī lau huuñ 'tanhā'

jī meñ jab aa.e bujhā lo ki jagā lo mujh ko

yahi aawaz ka mausam hai na Talo mujh ko

kuchh jawabon se nipaTne do sawalo mujh ko

main khara sikka hun jab chahe chala lo mujh ko

sar-e-bazar na rah rah ke uchhaalo mujh ko

aaine aaj ki tahzib ke sab patthar hain

phir se DhunDo mere mazi ke hawalo mujh ko

main na aaghaz na anjam na paikar ka asir

jaante hi nahin tum jaanne walo mujh ko

koi to haq hai andheron ka bhi mujh par aaKHir

phir kisi soch mein Dhalne do ujalo mujh ko

gham-e-afaq se nipTun to main KHud ki sochun

apna ehsas kahan chahne walo mujh ko

mera kya hai main to ehsas ki lau hun 'tanha'

ji mein jab aae bujha lo ki jaga lo mujh ko