یہ دل کیا ہے دیکھا دکھایا ہوا ہے

یہ دل کیا ہے دیکھا دکھایا ہوا ہے

مگر درد کتنا سمایا ہوا ہے

مرا دکھ سنا چپ رہے پھر وہ بولے

کہ یہ راگ پہلے کا گایا ہوا ہے

جھلک بھر دکھا جائیں بس ان سے کہہ دو

کوئی ایک درشن کو آیا ہوا ہے

نہ پوچھو یہاں تاپ کی کیا کمی ہے

سبھی کا ہردے اس میں تایا ہوا ہے

یہی درد تھا جس نے تم سے ملایا

یہ یوں ہی نہیں جی کو بھایا ہوا ہے

گڑھا موت کا ہے نہیں بھرنے والا

یہاں ان گنت کا صفایا ہوا ہے

ترلوچنؔ سناؤ ہمیں گان اپنے

جہاں درد جی کا سمایا ہوا ہے